破例第一次幫讀者搵工，已將CV send畀同事跟進，希望幫到手，因為我覺得Michelle冇做錯，可惜現階段佢話未方便開名，仲要坐足一個月先走得，否則幫佢老細一夜成名。
＝＝＝＝＝＝＝＝＝＝＝＝＝＝
投稿人：Michelle
噚日好多消息話元朗會有大廝殺，屯門同埋天水圍都會波及，後來仲提到沙田馬鞍山，我身為一個HR，有義務去保障同事安全，加上知道有唔少公司都畀同事早走，所以我就決定向老闆提議，冇諗過佢反應咁大，好似想食咗我咁，又話香港日日都有人搞事，唔通日日早收呀？佢仲賤格到話員工一離開咗公司，自己就要負責人身安全問題，所以6點放工即使有咩事，公司都唔理得咁多。
畀呢個垃圾女人噴到我一面屁，返出去本來想同同事呻下，不過幾個住喺新界區嘅同事已經開始好緊張，因為有唔少屋企人同朋友都開始WhatsApp佢哋，話外面氣氛唔尋常，同埋問有冇得早收？
結果我決定再入老細房同個垃圾女人反映多一次，仲搬埋其他商戶同公司畀員工早走嘅新聞出嚟，問下佢如果晏啲黑幫斬人誤中副車，同事受傷上晒報紙，我哋公司擔唔擔當得起？
最後個賤老細終於畀同事早走，但係都拖到4:45，仲要語帶不屑話我：「船頭驚鬼船尾驚賊，諗埋啲藉口想早收工」，我嗰下已經即時爆發同佢頂咗兩句，直情想即刻辭職，但都係叫自己冷靜啲先，最緊要安排同事離開，要佢哋安全返屋企。
今朝返到公司，呢個賤種老細竟然走埋嚟我張枱，好囂張咁話：「點呀？又話元朗屯門有事？靜過年初一喎！」跟住冷笑一聲就走咗去，唔使講嘢，一早就print咗辭職信即刻劈炮，呢個老細冇人性，跟唔過。
其實噚日返到屋企嘅情緒都好混亂，我都有預計到如果市面風平浪靜，第日返公司一定畀呢個賤老細串，不過我寧願畀人串畀人鬧，都唔想有一啲殺錯良民嘅事發生，我依然認為噚日向老細提出畀員工早走係冇錯，我最錯只係跟咗呢個老細，但係絕對唔後悔冇咗份工。
Search